Хөвсгөл аймаг дахь Политехник коллеж

Онцлох мэдээ

“БҮТЭЭЛЧ СУРГУУЛЬ” АРГА ХЭМЖЭЭ ЗОХИОН БАЙГУУЛАВ

Монгол улсын Засгийн газрын 2019 оны 204 дүгээр тогтоол, аймгийн Засаг даргын 2024 оны А/707 тоот захирамжаар батлагдсан “Амьдрах орчноо сайжруулж, өрхийн үйлдвэрлэлийг дэмжих жил”ийн хүрээнд нийгмийн салбарын байгууллагууд “Бид танд үйлчилье” өдөрлөг арга хэмжээг зохион байгуулсан юм.Тус арга хэмжээ нь Хөдөлмөр, нийгмийн хамгааллын салбарын ажилтны өдөр, Олон улсын Гэр бүлийн өдрийн хүрээнд зохион байгуулагдаж буйгаараа онцлогтой бөгөөд нийгмийн салбарын байгууллагуудын бодлого, үйл ажиллагааг иргэдэд сурталчлан таниулах, ажлын уялдаа холбоог хангах, иргэдийн санал хүсэлтийг сонсож, төрийн үйлчилгээг шуурхай хүргэх зорилготой юм.Энэхүү үйл ажиллагаанд ШУТИС-ийн харьяа Хөвсгөл аймаг дахь Политехник коллеж нь “БҮТЭЭЛЧ СУРГУУЛЬ” арга хэмжээг зохион байгуулж,2025-2026 оны хичээлийн жилд элсэлт авах мэргэжлүүдийн танилцуулга, багш,суралцагчдын бүтээлийн үзэсгэлэнг дэлгэн тавьсан юм.Нийгмийн салбаруудын бодлого, үйл ажиллагааг иргэдэд сурталчлах зорилго бүхий энэхүү арга хэмжээнд багш, ажилчид, суралцагчид оролцож, сургуулийн зорилго зорилт, мэргэжлийн хөтөлбөрийн танилцуулгыг олон нийтэд түгээлээ.Дээрх үйл ажиллагаанд 300 гаруй суралцагчид оролцлоо.

АЙМГИЙН БОЛОВСРОЛЫН ГАЗРААС ЧИГ ҮҮРГИЙНХЭЭ ХҮРЭЭНД ЗӨВЛӨН ТУСАЛЖ, МЭРГЭЖИЛ АРГА ЗҮЙН ДЭМЖЛЭГ ҮЗҮҮЛЖ ХАМТРАН АЖИЛЛАА

Сургалтын хөтөлбөрийн хэрэгжилтийг сайжруулах зорилгоор аймгийн Боловсролын газрын ахлах арга зүйч нар төвийн сургуулиудад зөвлөн тусалж, мэргэжил арга зүйн дэмжлэг үзүүлэн ажиллаж байна.Мэргэжлийн болон ерөнхий эрдэмийн 10 багшийн хичээлд сууж,  сургалтын хөтөлбөр, төлөвлөгөөтэй танилцлаа.Сургалтын төлөвлөгөө, хөтөлбөр, арга зүй, үнэлгээ, технологи хэрэгжилтийн талаар хэлэлцүүлэг өрнүүлж,  мэргэжил, арга зүйн удирдлагаар хангах, сайжруулах чиглэлээр зөвлөн тусаллаа.Багшийн мэргэжлийн тасралтгүй хөгжлийн хэрэгжилт, үр дүн, сургалтын байгууллагын үйл ажиллагааны чиглэлээр сургалт зохион байгууллаа.

АЙМГИЙН ХҮҮХДИЙН ТӨЛӨӨ ЗӨВЛӨЛИЙН 2025 ОНЫ I ХУРАЛДААНД ХҮҮХЭД ХАМГААЛЛЫН БАГИЙН ҮЙЛ АЖИЛЛАГАА, АНХААРАХ АСУУДЛЫН ТАЛААР МЭДЭЭЛЭЛ ХИЙЛЭЭ

Хүүхэд хамгааллын бодлогыг  сургалтын байгууллага бүр хэрэгжүүлэх үүрэгтэйгээр оролцож байгаа.Хүүхэд хамгааллын бодлогын хэрэгжилтэд аймаг, сумын хүүхэд хамгааллын зөвлөл хяналт тавьж ажилладаг юм. Аймгийн хүүхдийн төлөө зөвлөл боловсролын байгууллагын  хүүхэд хамгааллын бодлого, үйл ажиллагаанд хяналт шинжилгээ хийх, үр нөлөөг нь дээшлүүлэх  асуудлыг тэргүүн тавин ажиллаж буй юм. Энэ удаагийн хуралдаанаар  манай сургуулийн хүүхэд хамгааллын бодлого, үйл ажиллагаа, танилцуулга мэдээллийг сонсож,хүүхдийн эрхийн талаарх тодорхой анхаарах асуудлыг авч хэлэлцлээ.Салбар дундын хамтын ажиллагаа, уяалдаа холбоог сайжруулж, хүүхдийн эрхийн асуудлаар хамтарч ажиллахыг  үүрэг болголоо.

ХОЛБООНЫ БҮГД НАЙРАМДАХ ГЕРМАН УЛСААС МОНГОЛ УЛСАД СУУГАА ЭЛЧИН САЙД ХЭЛЬМУТ КУЛИТЦ МАНАЙ СУРГУУЛИЙН ҮЙЛ АЖИЛЛАГААТАЙ ТАНИЛЦЛАА

Холбооны Бүгд Найрамдах Герман Улсаас Монгол Улсад суугаа Элчин Сайд  Хэльмут Кулитц,  Хөгжлийн хамтын ажиллагаа хариуцсан хэлтсийн дарга Удо Вебер, Барут Марк хотын дарга Петер Илк  нарыг ШУТИС-ийн харьяа Хөвсгөл аймаг дахь Политехник коллежийн захирал Б.Ганхөлөг  хүлээн авч уулзлаа.Уулзалтаар сургуулийн бодлого, олон улсын хамтын ажиллагаа болон  материаллаг баазын талаар  дэлгэрэнгүй мэдээлэл хийлээ.Холбооны Бүгд Найрамдах Герман Улсаас Монгол Улсад суугаа Элчин Сайд  Хэльмут Кулитц хэлсэн үгэндээ “  Хөдөө аж ахуйн менежмент,экосистемийн тогтвортой байдлыг хангах төсөл бол том төсөл юм.Энэ төсөл  Монгол орны ойн сангийн 3,1 хувийг дангаараа  эзэлдэг Хөвсгөл аймагт хэрэгжих болсон нь сайшаалтай. Ойн аж ахуйг хөгжүүлэх, нөөцийг ашиглах бололцоо ихтэй аймаг учир энэ төсөл үр дүнтэй хэрэгжинэ гэж найдаж байна.Нөгөө талаар энэ салбарт ажиллах боловсон хүчинг чадавхжуулах нь чухал” гэдгийг онцлов.Сургуулийн захирал Б.Ганхөлөг хариу хэлэхдээ  “Манай сургуулийн тэргүүлэх чиглэл ойн мэргэжлийн хөтөлбөрт энэ төсөл хэрэгжих болсонд талархаж буйгаа илэрхийлж, байгаль орчны тэнцвэртэй байдлыг хангах, мэргэжлийн сургалт үйлдвэрлэл, боловсон хүчнийг чадавхжуулах талаар хамтарч ажиллах болно” гэдгийг онцлов.Төлөөлөгчид ойн аж ахуйн мэргэжлийн  дадлагын газрын орчин болон өмнө нь хэрэгжсэн төслийн үр дүнтэй танилцлаа.

"ЭРҮҮЛ МЭНД-ИДЭВХТЭЙ ХӨДӨЛГӨӨН" СПОРТЫН ТЭМЦЭЭНИЙ ШИЛДЭГҮҮД ТОДОРЛОО

Багш,ажилчдыг бие бялдрын сорилтод хамруулах,идэвхтэй хөдөлгөөнийг дэмжиж багаар ажиллах чадварыг сайжруулах зорилгын дор уг арга хэмжээг зохион байгуулсан. Байгууллагын ХАБЭА-н зөвлөл, Ёс зүйн дэд хороо, ЗАА-н ажилчдын хамтран зохион байгуулсан энэхүү арга хэмжээний хүрээнд Хөгжимт хөдөлгөөн, биеийн өндөр жин хэмжих, индекс тодорхойлох,зөвлөгөө өгөх Витаминжуулалт, сургуулийн аварга шалгаруулах гар бөмбөгийн тэмцээн тус тус зохион байгуулагдсан юм.  Байгууллагын ХАБЭА-н зөвлөл, Ёс зүйн дэд хороо, ЗАА-н ажилчдын хамтран зохион байгуулсан уг тэмцээн хоёр өдөр зохион байгуулагдаж өндөрлөлөө. Багш,ажилчдын спортын тэмцээнд 10 баг оролцож Тэргүүн байрыг Эрдэнэдалай ахлагчтай баг Дэд байрыг Лхагвасүрэн ахлагчтай баг Гутгаар байрыг Чулуунбаатар ахлагчтай баг тус тус эзлэв бусдыгаа хошуучлан манлайлав.  

ЗАРЛАН МЭДЭЭЛЛИЙН ДУУТ ДОХИОГООР ГАМШГААС СЭРГИЙЛЭХ ДАДЛАГА СУРГУУЛИЛТАД ХАМРАГДЛАА

 Монгол Улсын Засгийн газрын 2011 оны 339-р тогтоолоор батлагдсан "Гамшгийн аюулын тухай зарлан мэдээллийн дохио дамжуулах журам"-д заасны дагуу жил бүрийн З-р сарын дөрөв дэх долоо хоногийн пүрэв гарагийн 16:00 цагт улс орон даяар "Гамшгийн аюулын тухай зарлан мэдээллийн дохиогоор ажиллах дадлага сургууль"-ийг хийдэг.Энэ журмын дагуу ШУТИС-ийн харьяа Хөвсгөл аймаг дахь Политехник коллежийн багш,ажилчид, оюутан суралцагчид дуут дохиогоор ажлын байраа орхин гарч заасан цэгт цуглав.Аймгийн онцгой байдлын газрын нягтлан дэслэгч Н.Одхүү, гал түймэр унтраах, аврах 27-р ангийн салааны захирагч ахлах дэслэгч Д.Ганбаатар нар бэлэн байдлын үзлэг хийлээ.    

ГЕРМАНЫ ОЛОН УЛСЫН ХАМТЫН АЖИЛЛАГААНЫ НИЙГЭМЛЭГИЙН ТӨСЛИЙН ТӨЛӨӨЛӨГЧИД ШУТИС-ийн ХАРЬЯА ХӨВСГӨЛ АЙМАГ ДАХЬ ПОЛИТЕХНИК КОЛЛЕЖИЙН ҮЙЛ АЖИЛЛАГААТАЙ ТАНИЛЦАНА

Германы Олон Улсын хамтын ажиллагааны нийгэмлэгийн хөгжлийн зөвлөх Маркус Пеш, суурин төлөөлөгчийн газрын мэргэжилтэн С.Сайншүр, төслийн ахлах мэргэжилтэн Д.Заяасайхан нарыг ШУТИС-ийн харьяа Хөвсгөл аймаг дахь Политехник коллежийн захирал Б.Ганхөлөг хүлээн авч уулзан, сургуулийн танилцуулга мэдээллийг өглөө. Тус нийгэмлэг хөдөө аж ахуйн менежмент,экосистемийн тогтвортой байдлыг хангах төслийг манай аймагт хэрэгжүүлэх юм. Уг төсөл манай сургуульд ойн техникч бэлтгэх хөтөлбөрийн хүрээнд хэрэгжих бөгөөд төслийн багийнхан орчны үнэлгээ хийх, сургуулийн материаллаг бааз болон үйл ажиллагаатай биечлэн танилцах юм.  

МОНГОЛ УР ЧАДВАР-2025” СУРГУУЛИЙН ШАТНЫ УРАЛДААНЫ ШИЛДЭГҮҮД ТОДОРЛОО

Боловсролын ерөнхий газрын даргын 2024 оны А/200 дугаар тушаалаар батлагдсан “Мэргэжлийн болон техникийн боловсролын ур чадварын уралдаан зохион байгуулах журам”-ын дагуу “Монгол ур чадвар-2025” сургуулийн шатны уралдаан хоёр өдөр амжилттай болж өндөрлөв. Энэ удаагийн уралдаанд зургаан мэргэжлийн чиглэлээр оролцож, шилдэгүүдээ тодруулав. Механикжсан тээврийн хэрэгсэл, мехнизмын засвар үйлчилгээ мэргэжлийн ангилалд М.Алтанхуяг, Б.Баасансайханбаяр, Д.Дэлгэрмөрөн, Э.Лхагвадорж нар оролцож, тэргүүн байрыг Б.Баасансайханбаяр эзлэж, сургуулиа төлөөлөн үндэсний хэмжээний уралдаанд оролцох эрх авлаа. Хоолны үйлчилгээ мэргэжлийн ангилалд Б.Амгаланбат, Б.Батгэрэл, О.Батдалай, .Мөнх-Эрдэнэ нар оролцож тэргүүн байрыг О.Батдалай эзлэж сургуулиа төлөөлөн үндэсний хэмжээний уралдаанд оролцох эрх авлаа. Барилгын сантехник, хоолой угсралт мэргэжлийн чиглэлээр Б.Лхагбаяр, О.Түмэнцэнгэл, Ц.Лхагва-Очир, Ж.Төгсбилэгтболд нар оролцож тэргүүн байрыг Ц.Лхагва-Очир эзлэж, үндэсний хэмжээний уралдаанд оролцох эрх авлаа. Барилгын шал, хананы засал чимэглэлч мэргэжлийн чиглэлээр С.Пүрэвдалай, Б.Сугармаа, Н.Нямлхагва, З.Баасандорж нар оролцож тэргүүн байрыг С.Пүрэвдалай тэргүүн байр эзлэж үндэсний хэмжээний уралдаанд сургуулиа төлөөлөн оролцох эрх авлаа. Цахилгаан хангамж, тоног төхөөрөмж ашиглалт мэргэжлийн чиглэлээр Б.Хишигбат, Б.Лхагвадорж, Б.Гэрэлтбуд, Э.Буяннэмэх нар оролцож тэргүүн байрыг Э.Буяннэмэх эзлэж үндэсний хэмжээний уралдаанд оролцох эрх авлаа. Барилга бүтээц, угсралт / модон эдлэлийн мужаан/ мэргэжлийн чиглэлээр А.Нямбаяр, П.Пүрэвдалай, Б.Энхбаяр нар суралцагч оролцож тэргүүн байрыг А.Нямбаяр эзлэж үндэсний хэмжээний уралдаанд оролцох эрх авлаа. Шагналыг Аймгийн Боловсролын газрын дарга О.Бадраа, Мэргэжлийн болон техникийн боловсрол, дээд боловсрол хариуцсан ахлах арга зүйч Ц.Мөнхсоёл,Монгол улсын мастер тогооч У.Адьяаням, сургуулийн захирал Б.Ганхөлөг нар гардуулан өгч, амжилт хүслээ.  

"МОНГОЛ УР ЧАДВАР-2025" СУРГУУЛИЙН ШАТНЫ УРАЛДААНЫ НЭЭЛТ БОЛЛОО

Нээлтийн үйл ажиллагаанд Хөвсгөл аймгийн Боловсролын газрын мэргэжилтэн, аж ахуй нэгж байгууллагуудын эксперт шүүгч, мэргэжлийн хичээлийн эксперт багш нар оролцлоо. "Монгол ур чадвар-2025" сургуулийн шатны уралдаанаас улсын хэмжээнд зохион байгуулагдах шилдэг оролцогч шалгарах бөгөөд цаашлаад дэлхийн ур чадварын уралдаанд оролцох өргөн боломж, өмнө нь оролцож байсан туршлага бий гэдгийг ШУТИС-ийн харьяа Хөвсгөл аймаг дахь Политехник коллежийн захирал Б.Ганхөлөг онцлон хэллээ. Энэ удаагийн уралдаанд хоолны үйлчилгээ механикжсан тээврийн хэрэгсэл,механизмын засвар үйлчилгээ цахилгаан тоног төхөөрөмж ашиглалт барилгын сантехник хоолой угсралт барилгын шал, хананы засал чимэглэлч барилга бүтээц, угсралт мэргэжлийн чиглэлээр оролцож байна.  

БАГШ,СУРАЛЦАГЧДЫН ТАСРАЛТГҮЙ ХӨГЖЛИЙГ ДЭМЖИХ ЗОРИЛГООР МЭДЭЭЛЛИЙН ТЕХНОЛОГИЙН ЛАБОРАТОРИ БАЙГУУЛАХ ХАМТЫН АЖИЛЛАГААНЫ ГЭРЭЭНД ТАЛУУД ГАРЫН ҮСЭГ ЗУРЛАА

Бүгд Найрамдах Солонгос улсын үл хөдлөх хөрөнгийн холбоо, AI GLOBAL COLTD төлөөлөгч Таг Жон Ху, Барилга орон сууцны форум судлаач,P&D PARTNERSHIP төлөөлөгч И Мен Бон, GLOVSL KDI төлөөлөгч Ким Вон Сүи ШУТИС-ийн харьяа Хөвсгөл аймаг дахь Политехник коллежийн захирал Б.Ганхөлөг нар уг гэрээнд гарын үсэг зурж, хамтын ажиллагааг эхлүүлэв.Олон улсын төсөл хэрэгжих эхлэл тавигдсан нь хоёр орны найрсаг харилцаа бэхжих, коллежийн хувьд гадаад харилцааг өргөжүүлэх өргөн боломж гэж үзэж байгааг энэ үеэр талууд онцлов.  

ИНЖЕНЕР ТЕХНОЛОГИЙН ДЭЭД БОЛОВСРОЛ" ТӨСЛИЙН ХҮРЭЭНД ХИМИ,ФИЗИЗИЙН ЛАБОРТОРИЙН 140 ГАРУЙ САЯ ТӨГРӨГИЙН ӨРТӨГ БҮХИЙ ТОНОГ ТӨХӨӨРӨМЖ ГАРДУУЛЛАА

Монгол, Япон улсын засгийн газрын гэрээгээр Боловсролын яам JICA олон улсын байгууллагын дэмжлэгээр ШУТИС-д уг төсөл хэрэгжиж байгаа. Монгол улсын инженерийн салбарт шаардлагатай инженерийн хүний нөөцийг бэлтгэх,судалгаа,боловсролын чадавхыг сайжруулах,бэхжүүлэх, байгалийн ухааны хөтөлбөрүүдийг олон улсын түвшинд хүргэх нь энэ төслийн зорилго юм. Энэхүү төслийн үр дүн, ач холбогдол нь эрдэмтэн,багш, судлаачдын мэдлэг, заах арга зүй, чанар сайжрах, судалгааны лабораторийн тоног төхөөрөмж сайжрах, инженер болон байгаль орчны сургалт судалгааны мэдлэг, ур чадвар дээшлэхэд оршиж буй юм. Төслийн хүрээнд ШУТИС олон улсын зэрэглэлд нийцсэн байгалийн ухааны сургалт судалгааны хамгийн сүүлийн үеийн,өндөр нарийвчлалтай тоног төхөөрөмжийг ШУТИС-ийн харьяа Хөвсгөл аймаг дахь Политехник коллежд хүлээлгэн өглөө. Тоног төхөөрөмжийг хүлээн авах ёслол өнөөдөр болж, уг арга хэмжээнд Аймгийн Иргэдийн төлөөлөгчдийн хурлын дарга Д.Пүрэвдорж, ШУТИС-ийн захирал, доктор, профессор Т.Намнан, Хөвсгөл аймгийн Боловсролын газрын дарга О.Бадраа, бодлогын хэрэгжилтийн хэлтсийн дарга Ш.Отгон-Эрдэнэ, ШУТИС-ийн харьяа Хөвсгөл аймаг дахь Политехник коллежийн захирал Б.Ганхөлөг, Боловсролын үнэлгээний төвийн ахлах мэргэжилтэн З.Цолмончимэг, ЖАЙКА олон улсын байгууллагын сайн дурын ажилтан Сано Тошихиро болон багш, суралцагчид оролцлоо. Инженер болох хүсэлтэй залуусыг бэлтгэх, олон улсын хэмжээнд хүлээн зөвшөөрөгдсөн чанартай боловсролыг орон нутагтаа олгох боломж ийнхүү нээгдлээ.

МЭРГЭЖЛИЙН БОЛОН ТЕХНИКИЙН БОЛОВСРОЛЫН СУРГАЛТЫН БАЙГУУЛЛАГЫН ГҮЙЦЭТГЭЛИЙН ҮНЭЛГЭЭ ОРОН ДАЯАР ЗЭРЭГ ЭХЛЭВ

Мэргэжлийн болон техникийн боловсролын сургалтын байгууллагын үйл ажиллагааны гүйцэтгэл, чанар, үр дүнгийн үнэлгээ энэ сарын 10-14-ны өдрүүдэд үргэлжилнэ. Мэргэжлийн болон техникийн боловсролын сургалтын байгууллагын үйл ажиллагааны гүйцэтгэл, чанар, үр дүнгийн үнэлгээ 21 аймаг, нийслэлд нэгэн зэрэг өнөөдөр эхэллээ. ШУТИС-ийн харьяа Хөвсгөл аймаг дахь Политехник коллежийн автомашины мэргэжлийн хөтөлбөрийн онол, ур чадварын үнэлгээгээр гүйцэтгэлийн үнэлгээ эхэлсэн. Үнэлгээнд сонгогдсон барилгын цахилгаанчин, оёмол бүтээгдэхүүний оёдолчин, хоол үйлдвэрлэлийн мэргэжлийн хөтөлбөрийн ур чадварын үнэлгээ үргэлжилнэ.

ЖАЙКА-ИЙН САЙН ДУРЫН АЖИЛТАН САНО ТОШИХИРО АЯЛАЛ ЖУУЛЧЛАЛЫН ЧИГЛЭЛИЙН СУРГАЛТЫН ХӨТӨЛБӨРТ ХАМТРАН АЖИЛЛАНА

Монгол Япон хоёр орны хамтын ажиллагааны гэрээний дагуу байгууллагын хүсэлтийг үндэслэн аялал жуулчлалын чиглэлээр сайн дурын багш Сано Тошихиро манай сургуулийн бүрэлдэхүүнд орж, хоёр жилийн хугацаанд аялал жуулчлалын чиглэлээр ажиллана.Аялал жуулчлалын мэргэжлийн сургалтын хөтөлбөрийг боловсронгуй болгох,олон улсын туршлага солилцоонд чиглэсэн сургалтын хөтөлбөр бий болгох,тус салбарын зах зээлд оюутан суралцагчдыг ажлын байртай болгох,аялал жуулчлалын салбар дахь оюутан, туршлагатай мэргэжилтнүүдийн сүлжээ үүсгэх зэргээр хамтын ажиллагааны зорилгыг тодорхойлов.Сайн дурын багш Сано Тошихиро нь ижил мэргэжлийн хүнд өөрийн мэдлэг туршлагаа хуваалцах,зөвлөгөө өгөх,аялал жуулчлалын хичээл заах,аялал жуулчлалын хичээлийн хөтөлбөрийг сайжруулах, сургуулийн зүгээс өгсөн бусад ажлыг хийж гүйцэтгэх юм.  

МЭРГЭЖЛИЙН БОЛОН ТЕХНИКИЙН БОЛОВСРОЛЫН СУРГАЛТЫН БАЙГУУЛЛАГЫН ГҮЙЦЭТГЭЛИЙН ҮНЭЛГЭЭГ ОРОН НУТАГТ ЗОХИОН БАЙГУУЛАХ АЖЛЫН ХЭСЭГ ҮНЭЛЭЭЧ НАРТ МЭДЭЭЛЭЛ ХИЙЛЭЭ

Мэргэжлийн болон техникийн боловсролын сургалтын байгууллагын гүйцэтгэлийн үнэлгээг орон нутагт зохион байгуулах ажлын хэсгийг Хөвсгөл аймгийн Боловсролын газрын дарга О.Бадраагийн тушаалаар байгуулсан бөгөөд ажлын хэсгийн ахлагчаар Боловсролын газрын Бодлогын хэрэгжилтийн хэлтсийн дарга Ш.Отгон-Эрдэнэ, нарийн бичгийн даргаар Мэргэжлийн болон техникийн боловсрол, дээд боловсрол хариуцсан ахлах арга зүйч Ц.Мөнхсоёл, гишүүдээр боловсролын хяналтын улсын байцаагч Сургалт арга зүйн хэлтсийн дарга Н.Хонгорзул, хоол үйлдвэрлэл сургалтын орчин хариуцсан ахлах арга зүйч Г.Түвшинжаргал, хяналт үнэлгээ шинжилгээ хариуцсан ахлах арга зүйч Н.Шүрэнчулуун, аймгийн Үйлдвэрчний хорооны гишүүн Б.Мөнх-Орчлон нар томилогдсон байна.Ажлын хэсэг Мэргэжлийн болон техникийн боловсролын сургалтын байгууллагын гүйцэтгэлийн үнэлгээг сургуулийн түвшинд зохион байгуулах үнэлээч нартай уулзаж, зохион байгуулалтын талаар мэдээлэл хийлээ.

МЭРГЭЖЛИЙН БОЛОН ТЕХНИКИЙН БОЛОВСРОЛЫН СУРГАЛТЫН БАЙГУУЛЛАГЫН УДИРДАХ АЖИЛТНЫ ЗӨВЛӨГӨӨНД ШУТИС-ИЙН ХАРЬЯА ХӨВСГӨЛ АЙМАГ ДАХЬ ПОЛИТЕХНИК КОЛЛЕЖИЙН ЗАХИРАЛ Б.ГАНХӨЛӨГ ОРОЛЦЛОО

Зөвлөгөөнийг нээж Боловсролын сайд П.Наранбаяр мэргэжлийн болон техникийн боловсролын салбарт барьж ажиллах бодлого, чиглэлийн талаар мэдээлэл өглөө.Мэргэжлийн болон техникийн боловсролын дэмжих сангийн үйл ажиллагаа, түүний зарцуулалт, хөдөлмөрийн зах зээлийн эрэлт, ур чадварын шаардлагад нийцсэн мэргэжлийн болон техникийн боловсролын салбарыг хөгжүүлэх, салбарын цахим системийн өнөөгийн байдал, хөгжүүлэлт, магадлан итгэмжлэл, гүйцэтгэлд суурилсан санхүүжилт, хосмог сургалт, жендэр зэрэг асуудлаар мэдээлэл солилцов. ШУТИС-ийн харьяа Хөвсгөл аймаг дахь Политехник коллежийн захирал Б.Ганхөлөг 2025 оны үр дүнгийн гэрээг Боловсролын ерөнхий газрын дарга Ц.Ням-Очиртой  байгуулав.  

2024-2025 ОНЫ ХИЧЭЭЛИЙН ЖИЛИЙН ӨВЛИЙН ТӨГСӨЛТӨӨ ХИЙЛЭЭ

Энэ удаагийн төгсөлтийг "Ажлын байртай төгсөгч" өдөрлөгийн хүрээнд зохион байгуулсан. ШУТИС-ийн харьяа Хөвсгөл аймаг дахь Политехник коллеж 2024-2025 оны хичээлийн жилийн өвлийн төгсөлтөөр 13 мэргэжлийн хөтөлбөрөөр 172 мэргэжилтэй ажилтан бэлтгэгдэж хөдөлмөрийн зах зээлд гарлаа. Мэргэжлийн боловсрол олгох 2.5 жилийн сургалтын хөтөлбөрөөр Барилгын засал чимэглэлч Барилгын цахилгаанчин Барилгын сантехникч Оёмол бүтээгдэхүүний оёдолчин Авто засварчин Аяллын хөтөч Тогооч Мэргэжлийн боловсрол олгох 1 жилийн сургалтын хөтөлбөрөөр Барилгын цахилгаанчин Зочид буудал зоогийн газрын ажилтан Цэцэрлэгт хүрээлэн цэцэрлэгжүүлэлт Хүнсний ногооны фермер Гагнуурын Модон эдлэлийн мужаан Тогоочийн мэргэжлээр нийт 172 суралцагч мэдлэг,ур чадвар хандлага эзэмшин,мэргэжлийн үнэмлэхээ гардан авлаа

ШУТИС-ИЙН БҮРЭЛДЭХҮҮН СУРГУУЛИУДЫН БАГШ, АЖИЛТНЫ СПОРТЫН ТЭМЦЭЭНД АМЖИЛТТАЙ ОРОЛЦЛОО

ШУТИС-ийн харьяа Хөвсгөл аймаг дахь Политехник коллеж-баг тамирчид ШУТИС-ийн 21 бүрэлдэхүүн сургуулиудын багш, ажилтны 7 төрөлт спортын тэмцээнд амжилттай оролцлоо.21 бүрэлдэхүүн сургуулиудын 2200 багш, ажилтны төлөөллийн 1000 гаруй баг тамирчид оролцсон тус тэмцээний волейболын төрөлд эрэгтэй баг тамирчид тэргүүн байр эзэлж, Алтан медаль авав.Биеийн тамирын багш З.Энхбат волейболын шилдэг тоглогчоор шалгарав.

ХОЛБООНЫ БҮГД НАЙРАМДАХ ГЕРМАН УЛСЫН БАРУТ МАРК ХОТЫН ДАРГАТАЙ УУЛЗЛАА

ШУТИС-ийн харьяа Хөвсгөл аймаг дахь Политехник коллежийн захирал Б.Ганхөлөг Барут Марк хотын дарга Петер Илкийг хүлээн авч уулзлаа.Манай сургуулийн тэргүүлэх чиглэл ойн салбар гэдгийг онцлон тус хотоос хэрэгжүүлж буй урт хугацааны төсөлд хамтран ажиллахад бэлэн гэдгийг илэрхийлэв.Барут Марк хотын дарга Петер Илк хариу хэлэхдээ "Орон нутгийн зүгээс замын зардлын асуудлыг шийдэж өгвөл танай сургуулийн багш суралцагчийг Герман улсад ойн мэргэжлийн чиглэлээр практикт суурилсан туршлага солилцох хөтөлбөрт хамруулах бүрэн боломжтой.Бусад зардлыг манай зүгээс бүрэн даана.Энэ салбарт хамтран ажиллахад нээлттэй" гэдгийг онцлов.  

ШУТИС-ИЙН ХАРЬЯА ХӨВСГӨЛ АЙМАГ ДАХЬ ПОЛИТЕХНИК КОЛЛЕЖИЙН УДИРДАХ ЗӨВЛӨЛИЙН 3-Р ХУРАЛ БОЛЛОО

Удирдах зөвлөлийн хурлаар 2024 оны сургуулийн гүйцэтгэлийн жилийн эцсийн тайланг хэлэлцэж дүгнэх, 2024 оны санхүүгийн тайлангийн тайлан /төлөвлөгөө, гүйцэтгэл/ хэлэлцэх,дүгнэх Өөрийн орлого бүрдүүлэлт зарцуулалтын тайлан /өөрийн орлого бүрдүүлэлт зарцуулалтын журмын төслийн санал хэлэлцүүлэх, батлуулах/ 2025 онд ажиллах орон тооны бүтцийг хэлэлцүүлэн шийдвэрлүүлэх, 2025 оны сургуулийн гүйцэтгэлийн төлөвлөгөөг хэлэлцүүлэх зэрэг асуудлыг авч хэлэлцлээ.  

ШУТИС-ИЙН ХАРЬЯА ХӨВСГӨЛ АЙМАГ ДАХЬ ПОЛИТЕХНИК КОЛЛЕЖИЙН ЗАХИРЛААР Б.ГАНХӨЛӨГ ТОМИЛОГДЛОО

Боловсролын ерөнхий газрын даргын 2024.12.24-ны өдрийн Б/353-р тушаалаар ШУТИС-ийн харьяа Хөвсгөл аймаг дахь Политехник коллежийн захирлаар Б.Ганхөлөгийг томилов.Захирлын ажлыг хүлээлцэх үйл ажиллагаа болж, тамга тэмдгийг гардуулан өгөв.Захирал Б.Ганхөлөг энэ үеэр хэлсэн үгэндээ “ 1993 оноос хойш энэ сургуульдаа тасралтгүй 31 дэх жилдээ ажиллаж байна. 1994 оноос хойш анх удаа дотроосоо тавигдаж буй захирал гэдгээрээ онцлог бөгөөд 19 дэх захирал болж байна. Сургууль маань нийгэм эдийн засгийн шилжилтийн үеийн амаргүй он жилүүдийг даван туулж өнөөдөртэй золгосон. Зарим сургуулиуд цалингаа тавьж чадахгүй татан буугдаж байсан бол манай сургууль зах зээлийн шуургыг хамт олны нэгдмэл санаа зорилго, урагшаа тэмүүлсэн их зорилгоор даван гарсан. Хэдий амаргүй байсан ч өнөөдрийн энд хүрч чадсан. Уламжлалгүй шинэчлэл гэж байдаггүй учир үе үеийн захирлуудын арга барил, хуримтлуулсан туршлага дээрээ тулгуурлан мэргэжлийн боловсон хүчин бэлтгэх их үйлсэд хамт олныхоо хамтаар түүчээлж ажиллана” гэдгийг онцлов.

УТИС-ийн ХАРЬЯА ХӨВСГӨЛ АЙМАГ ДАХЬ ПОЛИТЕХНИК КОЛЛЕЖ ОНЫ ШИЛДЭГ СУРАЛЦАГЧ, АНГИ ХАМТ ОЛНЫГ ТОДРУУЛАВ

2024 онд сурлага, урлаг, спортоор бусдыгаа хошуучлан манлайлсан шилдэг суралцагчдыг тодруулж,  шинэ жилийн баярын бэлэг гардуулав. 2024 оны ШИЛДЭГ АНГИ -иар Ц.Ганцэцэг багштай 10д, ОНЫ ОНЦЛОХ АНГИ -иар Ш.Алтанцэцэг багштай 11к анги тус тус шалгарлаа. Оны шилдэг хүүхдээр авто засварын 10в ангийн суралцагч Б.Бат-Ирээдүй Мэдээллийн технологийн 11ё ангийн суралцагч А.Цолмон Оёдлын техникийн 2г ангийн суралцагч Б.Ариунаа Тогоочийн 12ё ангийн суралцагч П.Номин- Очир нар шалгарлаа. Оны шилдэгүүдээр тодорсон суралцагч,анги хамт олонд сургуулийн захиргаа  шинэ жилийн мэнд хүргэж, сурлага урлаг,спортын өндөр амжилт хүсэн ерөөе  

“ЗӨВ ХҮҮХЭД” КОНТЕНТЫН УРАЛДААНД СУРГУУЛИЙН НОМЫН САНГИЙН ДЭРГЭДЭХ “НОМЧ МЭРГЭД” КЛУБ ДЭД БАЙР ЭЗЛЭВ

Аймгийн засаг даргын тамгын газраас "Хүүхдийн хөгжил хамгааллыг дэмжих" нэрлэсэн жилийн хүрээнд зохион байгуулсан "Зөв хүүхэд" контент бүтээх уралдаанд Номын сангийн дэргэдэх "Номч хүүхэд" клубын гишүүд оролцож, дэд байр эзэллээ. Энэхүү уралдаанд оролцосноор хүүхэд бие даан хөгжих,ТВ контент бэлтгэж сурах арга зүйд давхар суралцлаа.  

"ҮНДЭСНИЙ ӨВ СОЁЛОО ДЭЭДЭЛЦГЭЭЕ" ХИЧЭЭЛЭЭС ГАДУУРХ ҮЙЛ АЖИЛЛАГААГ ЗОХИОН БАЙГУУЛАВ

Суралцагчдын хөгжил төлөвшил, багаар ажиллах үйл ажиллагааг дэмжих, оролцоог нэмэгдүүлэх, мэргэжлээрээ бахархах, үндэсний өв соёлоо дээдлэх, Монгол уламжлалаа судлах, үндэсний хувцасны хэрэглээ, өв соёлыг сурталчлах зорилгоор уг ажлыг зохион байгуулав.Мөн энэ үеэр аймгийн музейн мэргэжилтэн н.Одмаа дээлний соёлын талаар мэдээлэл хийлээ.Суралцагчид монгол орны бүс нутгийн онцлог амьдралын хэв маяг, ястны хувцас өмсгөлийн талаар судлаж, ханын сонин хийх,,Хөвсгөл аймгийн ястангуулын онцлог хувцас хэрэглэлийн соёлын талаар танилцуулга хийх, Хөвсгөл нутгаа хэн сайн мэдэх вэ, монгол орноо хэн сайн мэдэх вэ, АХА, монгол наадгай тоглох зэрэг танин мэдэхүйн өртөөчилсөн аялал зохион байгуулж мэдлэгээ тэлсэн юм.Энэхүү ажлыг соёлын бүтээлч сарын аяны хүрээнд зохион байгуулсан гэдгээрээ онцлог болов.

"БАЙГУУЛЛАГЫН СОЁЛЫГ ТӨЛӨВШҮҮЛЭХЭД БИДНИЙ ОРУУЛАХ ХУВЬ НЭМЭР" ЭРДЭМ ШИНЖИЛГЭЭНИЙ БАГА ХУРАЛ АМЖИЛТТАЙ БОЛЖ ӨНДӨРЛӨЛӨӨ

2024-2025 оны салбарын болон сургуулийн зорилго, зорилтын хүрээнд багш, ажилтнуудын судалгаа шинжилгээ хийх арга зүйг дээшлүүлэх, шинэ санаа шийдлийг гаргаж хэлэлцүүлэн цаашид байгууллагын үйл ажиллагаанд хэрэгжүүлэн ажиллах зорилго бүхий уг хуралд 10 баг оролцлоо.Монгол улсын зөвлөх багш Ж.Баттогтох ахлагчтай баг тэргүүн байр, Н.Нямдорж ахлагчтай баг дэд байр, Н.Нарантунгалаг ахлагчтай баг гутгаар байрыг тус тус эзлэв. Багуудын гаргасан шинэ санаа шийдлийг хэлэлцүүлэн байгууллагын үйл ажиллагаанд хэрэгжүүлэхээр боллоо.

ЖАЙКА-ИЙН САЙН ДУРЫН АЖИЛТАН АЯЛАЛ ЖУУЛЧЛАЛЫН ЧИГЛЭЛЭЭР ХАМТРАН АЖИЛЛАНА

Байгууллагын хүсэлтийг үндэслэн ЖАЙКА сайн дурын гишүүдээ томилдог бөгөөд Хөвсгөл аймаг дахь Политехник коллеж аялал жуулчлал,ойн чиглэлээр хамтран ажиллах хүсэлт гаргасан.Монгол Япон хоёр орны хамтын ажиллагааны гэрээний дагуу байгууллагын хүсэлтийг үндэслэн аялал жуулчлалын чиглэлээр сайн дурын багш хоёр жилийн гэрээтэй ирж ажиллахаар боллоо.Сайн дурын багш нь ижил мэргэжлийн хүнд өөрийн мэдлэг туршлагаа хуваалцах,зөвлөгөө өгөх,аялал жуулчлалын хичээл заах,аялал жуулчлалын хичээлийн хөтөлбөрийг сайжруулах, сургуулийн зүгээс өгсөн бусад ажлыг хийж гүйцэтгэх юм. Ирэх оны 2-р сард сайн дурын багш хоёр жилийн гэрээтэй ирэх талаар ЖАЙКА-ийн Монгол дахь Төлөөлөгчийн газрын сайн дурын гишүүдийн зөвлөлийн зохицуулагч Миёоши Акира захирлын үүргийг хавсран гүйцэтгэгч С.Баттуяад танилцуулалаа.      

"ТҮНШЛЭГЧ-2024" СПОРТЫН ТЭМЦЭЭН АМЖИЛТТАЙ БОЛЖ ӨНДӨРЛӨЛӨӨ

ШУТИС-ийн харьяа Хөвсгөл аймаг дахь Политехник коллежтэй хамтран ажилладаг түншлэгч байгууллагуудын дундах спортын тэмцээнд амжилттай зохион байгуулагдаж өндөрлөлөө. Түншлэгч байгууллагуудын хамтын оролцоог нэмэгдүүлэх, чөлөөт цагийг зөв боловсон өнгөрүүлэх зорилгын дор гар бөмбөг, дарс төрлөөр зохион байгуулагдав. "Түншлэгч-2024" спортын тэмцээнд хамтын ажиллагаатай байгууллагуудын 100 гаруй тамирчид оролцсон өргөн хэмжээний тэмцээн боллоо.

ТҮНШЛЭЛД СУУРИЛСАН ТЕХНИКИЙН БОЛОН МЭРГЭЖЛИЙН БОЛОВСРОЛ СУРГАЛТ- II" ТӨСЛИЙГ ТАНИЛЦУУЛЛАА

Германы Олон Улсын хамтын ажиллагааны нийгэмлэг GIZ-нь дээрх төслийг хэрэгжүүлж буй юм.Төслийн 2 шат гурван аймагт хэрэгжих болсны нэг нь манай аймаг юм.Уг төсөл ой болон ХААН-н салбарт хэрэгжинэ Мэргэжлийн болон техникийн боловсрол ,сургалтын тогтолцоонд хосмог сургалтыг нэвтрүүлэхэд оролцогч талуудыг чадавхжуулах нь энэ төслийн зорилго юм. Төсөл хэрэгжүүлэх сургуулийг Мэргэжлийн баг сонгон шалгаруулах бөгөөд төслийн баг сургуулийн үйл ажиллагаатай танилцлаа. ХБНГУ-аас Монгол Улсад суугаа онц бөгөөд бүрэн эрхт элчин сайд,Германы Олон Улсын хамтын ажиллагааны нийгэмлэг, Байгаль орчны яам, Боловсролын ерөнхий газар ,НҮБ-ын Хүнс хөдөө аж ахуйн төлөөлөл оролцсон өргөн хэмжээний уулзалт боллоо

"ЯРГУЙ" УРЛАГИЙН НААДАМ АМЖИЛТТАЙ ЗОХИОН БАЙГУУЛАГДАВ

Суралцагчдын хөгжил оролцоо,авьяас чадварыг нээх, өв соёлыг өсвөр хойч үед өвлүүлэн үлдээх зорилгын дор ЯРГУЙ урлагийн наадам зохион байгуулагдав. Найрал дуу Хүүхдийн дуу Ардын дуу Гоцлол бүжиг Хамтлаг бүжиг Гоцлол хөгжим Язгуур урлаг зэрэг урлагийн найман төрөлд 10-11 ангийн суралцагчид оролцож,шилдгүүдээ тодрууллаа.

СУРГУУЛЬ ТАНИЛЦУУЛАХ ҮЙЛ АЖИЛЛАГАА БОЛЛОО

ШУТИС-ийн харьяа Хөвсгөл аймаг дахь Политехник коллеж-ийн захиргаанаас сургууль танилцуулах ажлыг зохион байгууллаа. "Дэлгэрмөрөн" ЕБС-ийн 9-р ангийн 4 бүлгийн 80 гаруй сурагчид коллежийн мэргэжлийн ангийн үйл ажиллагаатай танилцлаа. Мэргэжлийн ангиудыг сонгон суралцсанаар сар бүрийн 200.000 төгрөгийн мөнгөн тэтгэмж,ШУТИС-д шатлан суралцах боломжтой юм.  

"Хөвсгөлийн багш-2024" спортын наадмын нээлт боллоо

Дэлхийн багш нарын 30, Монголын багш нарын 58 дахь өдрийг тохиолдуулан зохион байгуулсан "Хөвсгөлийн багш-2024" спортын наадмын нээлтийн үйл ажиллагаа амжилттай болов.  "Хөвсгөлийн багш-2024" спортын наадамд 31 багийн 700 гаруй тамирчид оролцож байна. Энэ удаагийн наадмыг ШУТИС-ийн харьяа Хөвсгөл аймаг дахь Политехник коллеж амжилттай зохион байгуулав.

Удирдах зөвлөлийн хурал боллоо

ШУТИС-ийн харьяа Хөвсгөл аймаг дахь Политехник коллежийн удирдах зөвлөл нь 9-н хүний бүрэлдэхүүнтэй.  Удирдах зөвлөл нь Аймгийн ИТХ-ын дарга Д.Пүрэвдорж,  ШУТИС-ийн захирал Т.Намнан, түншлэгч байгууллагын төлөөлөл, багш,ажилчдын төлөөлөлөөс бүрддэг. 2024-2025 оны хичээлийн жилийн удирдах зөвлөлийн анхдугаар  хурлаар ШУТИС-ийн харьяа Хөвсгөл аймаг дахь Политехник коллежийн захирлын үйл ажиллагааны тайланг сонсож,удирдах зөвлөлийн болон коллежийн дүрмийг хэлэлцэж батлав.

"Мэргэжлээ крашлая" боловсролын өдөрлөг-2024 үйл ажиллагаанд оролцлоо

Боловсролын ерөнхий газар, "Оюу толгой" ХХК-аас ахлах ангийн сурагчдад мэргэжлээ сонгоход нь туслах, ирээдүйд үнэ цэнтэй ажил мэргэжлийн чиг баримжаа олгох зорилгоор уг өдөрлөгийг зохион байгууллаа. Энэхүү өдөрлөгөөр ШУТИС-ийн харьяа Хөвсгөл аймаг дахь Политехник коллеж Хөдөлмөрийн зах зээл дэх эрэлттэй мэргэжлийг хэрхэн эзэмших, цаашид шатлан суралцах боломжийн талаар 100 гаруй суралцагчдад зөвлөгөө мэдээлэл өгч, ажиллаа.

Түншлэгч байгууллагуудыг хүлээн авч уулзлаа

ШУТИС-ийн харьяа Хөвсгөл аймаг дахь Политехник коллежийн оюутан суралцагчид ээлжит дадлагад гарах гэж байна. Энэ хүрээнд сургуулийн удирдлагууд барилгын мэргэжлийн оюутан суралцагчдыг дадлагажуулах түншлэгч байгууллагуудын удирдлагуудыг хүлээн авч уулзлаа. Уулзалтаар барилгын салбарын аж ахуй нэгж байгууллага мэргэжлийн сургуультай хамтран ажилласаар ямар ямар давуу тал байдаг талаарх мэдээллийг өглөө. Мөн хүүхэд хамгаалалын талаарх зөвлөмж өгч, барилгын салбарын аж ахуй нэг байгууллагад хувиарласан дадлагажих хүүхдийн тоог танилцууллаа. Цаашид хэрхэн хамтран ажиллах талаар гурвалсан гэрээ байгуулан ажиллахаар болов.  